لوخسرت ماخسرت العمر والدنيا متاع‏

لوخسرت ماخسرت العمر والدنيا متاع
وادري اني لوخسرتك ماخسرت الا قليل
بس فكر زين تعرف من خسر فينا وضاع
وتعرف انك لوتلف الأرض وتدور بديل
والله ان تبطي ولولفيت في كل البقاع
ولوتسوي وش تسوي منت لاقي لي مثيل
وين تلقى مثل شخصي شخص واطباعي طباع
ووين تلقى مثل قلبي قلب أو مثلي خليل
البشر واجد نعم لكن فرق الانطباع
يجعلك يمي تميل ويم غيري ماتميل
يارفيقي انتبه وأحسن الي الاستماع
للمواقف دور في كشف المزيف والأصيل
وانت ماقصرت فيني موقفك جدا شجاع
طعنتك في الظهر فعلا كانت اثبات ودليل
بيض الله وجهك اللي ساتره تحت القناع
ورايتك بيضاء معاي وعسى عمرك طويل
يعني اعطيك الثقة وتردها بلوي الذراع
ياخي ماشاء الله عليك ابدعت في رد الجميل
مدري كيف اشكرك مدري كيف ارد الصاع صاع
كنت أحسب انك عزيز النفس تطلع لي ذليل
كم وانا عييت اصدق فيك قدر المستطاع
من غبائي كنت اسكت واعذرك
واثر الحصيل
جرح قلب ميزته في كل يوم الاتساع
ودمع عيني ينهمر من ضيقتي في كل ليل
والله اني احبك حب واتبعك اتباع
كنت لاجل ارضي غرورك بس اسوي المستحيل
كنت اعمى فيك لالا كنت ميت للنخاع
كنت مدري كيف لكن كنت صادق معك حيل
كنت امارس في غرامي لك سياسة الانصياع
وكنت لاغي معك فكرة اعتزل او استقيل
اندفعت بكل مافيني وسوء الاندفاع
يجبر الانسان احيان يفكر بالرحيل
صدمتي فيك انت خلتني افكر باقتناع
ان قتل النفس راحة لو انا كنت القتيل
انفجر راسي من التفكير وازداد الصداع
كيف انابفتك من جرحك ودوشة قال قيل
صرت سيره في حلوق الناس وتالي هالضياع
انتحر معقول يالله وش هذا الغليل
رحمتك يارب لامن ضاقت امنحني وساع
انت حسبي في الزمن الجاير ونعم الوكيل
لاغدى مستقبلي والماضي اطراف النزاع
وصفحة الماضي سواد وشيء من هذا القبيل
فلازم انسى لجل انهي داخلي هذا الصراع
ولازم اتقوى عشان احقق النصر الجليل
وطالما ان الهجوم افضل وسيله للدفاع
مستحيل ارضخ لو ان الحمل ياربعي ثقيل
والبخيل اللي نساني وأشترى فيني وباع
يذلف الله لايرده والله بجرحي كفيل
وان سأل عني وجاكم بعد فترة وانقطاع
علموه اني نسيته بس انا ماني بخيل
طالما كان السبب في قوتي قبل الوداع
بلغوه أقل شيء بخالص الشكر الجزيل